Bangmahlo pan mihaupi asuakte
IKEA Founder pa,
Amah pen aneutung a kipan sangah laisim sang vanzuak/lei pen ukzaw hi. Kum 5 aphakma in sangvan te zii pan lei in sanginn ah amet in zuakkik hi. Meisah ziipan lei in a innveng te kiangah amet in zuakkik hi. Kum 17 aphak in apa kiangpan sumleitawi in store sai khat honghi. Amau ten na khuapi ah innsung vanzatte mantam thei lua ahih manin kuaman leizo lo cih ngaihsun kha hi. Tua ahihman in mikim ih leizawh ding innsung vanzatte azuak zawh nang a hanciam kawmin, leitung mun tuamtuam ah IKEA kici innsungvanzat kizuakna mall lianpite hongzo hi. Amin pen Ingvar Kamprad kici hi. Sweden minam hi. IKEA hangin billianer khat hong suakhi. Amah bangci dan hanciam in Mall lianpi te hongzo cih lunglut huai a hihman in hong atkhia ing.
Ingvar pen 1926 march 30 ni in Sweden gam Smalandiya khuapi ah suakhi. Apu pen Business man khat hi in, abusiness aki siat tak ciang aleibat tamlua in lohkikzo nawnlo hi. Tuapan zumlua ahihman in amah leh amah kithat hi. Ingvar ih pi in company ih leibat te lohkik sak zohi. Api in Ingvar tungah agen den thu khatin “Nasep khat nasep ciangin hatsatna te nagualzawh theih nang in lungsim khauh tak in lampi zongin” ci vaikhak den hi. Ingvar in zong anuntak sungin alungsim sungah ciamteh tawntung hi.
Ingvar pen akhuak hoihphalo ahih manin sanglaisinah alawmte sang hun piakkul zawhi. Tua ahih manin pilnalam ah hatkhollo hi. high school aman ciang in amat hoih lo a hih manin college kahtheilo hi. Ahihhang in amah pen aneutung a kipan business idea neikhin hi. Laikung, laidal te ziipan mantawm a lei in sangpan alawm te kiangah amet tawh zuakkik hi. tua bek thamlo nektheih tuamtuam, Christmas card te saipi pan mantawm in la in alawmte kiangah zuakkik hi. Aneu tunga kipan business bawl dan sum amet ngah dan pen tel mahmah khin hi. Sanginn ah laisin sang vanzuak/lei pen lunglut zaw hi.
Tuatawh kisai in aman hibang in genhi:
“Business kabawlna ah banghangin midangte sang lawhcing zawkahiam cihleh keipen kaneutung a kipan business kabawl theita hi. Nikhat kanu neu kiangah meisah bung 100 ka ngenhi. bung khatciang in 88 cent manhi. kavengte kiangah bungkhatciang pek 1, ahih keileh pek 2 bang in kaleisak kik hi. amasa pen ametkangah ahih manin tuazan kaihmu theikei hi. tuahunlai in kum 5 zongkapha naikei hi” cihi. Sangtuak ciang aclassmate te akimawl hun, alianzaw deuh te nungak te tawh akimuh hun in Ingvar ahih leh tutphahsau tungah tu in bang business bawl leng hoih dinghiam ci in ngaihsunsun hi. 1943 kum, amah kum17 aphak in store sai khat honghi. Sai bangci hon in, sum koi pan ngah hiam cih leh: Apa kiangpan sum leitawihi. Apa in asang ah aleinop akisap omhi inteh ci in bangmah dongnawnlo in sumpiahi. Apakiangpan a sum leh amaneih sumte tawh sai hongzo hi.
Asai min IKEA ci in minpia hi. IK pen amamin Ingvar Kamprad hiin EA ahih leh Ama om na veng Elmtaryd leh khuamin Agunnartd pan alak hi. Asai hon ni in saiah apai khempeuh coffee haikhat leh bengmoh phengkhat tek piahi. tua ahihman in saihon ni apai pen mipi atul lom in phahi. Asai ah van namkim tawmta koih hi. A ki deih pen in ballpen leh pencil hi. Laikung ki khawng lua ahih manin bank pan sweden sum 500 leitawi in French gam paris pan laikung mal 500 vaikhak hi. Ingvar in “kanuntak sung midangkiangah sumkaleitawi amasa pen leh atawpna hi” ci hi.
1948 kumin Ingvar in ama om na khua ah thupiang te ngaihsun khahi. tuainbanghiam cihleh singtawh kibawl innsung vanzat te pen mantamlua in mihau te bekin lei zo cih ahihi. Tuaahihmanin aman singtawh akibawl innsung vanzatte zuakzawh nang nasepkhat ngaihsun hi. Ingvar in hibang in genhi:
“Tuahunin kavengkiim ah Guimars Fabriker in singtawh kibawl innsung vanzat te azuakzawh sawtta hi. ama vante pen news te sungah zong suaksak hi. ahihhangin avante mantam lua hi. ken amahsang akiman zaw in zuakding khensat ing. ka khensat khitciang in bangcidan in akiman in bawltheiding cih ngaihsun paning” cihi.
Ingvar in avengkiim a om singtawh kibawl furniture te abawl factory te kiang ah pai kawikawi in akiman a abawlsak zoding zong hi. amuh khitciangin nongkhiap laileh tampipi hongbawlsak dinghi ing ci hi deklaihi. Furniture te asai ah zuakhi. Adangsai te sang kiman zaw ahih manin asai miten zuanzaw uhhi.
1951 ciangin IKEA News ci in laihawmkhat(flyer) bawlkhia hi. tua laisungah furniture atuamtuam te lim, aman zah zong atpah hi. Tuahun laiin hibang flyer cih omnailo hi. Ingvar in atarget customer pen sumlut tawmte hi. tua ahihmanin amet tawmbek la in kiman takin zuakhi. ” Tuhphah mal 60 mantam pi a ih zuaksang, mal 600 mantawm a ihzuak pen amet tamkingah zaw hi” cihi. Asawtlo in Ingvar in furniture bawl na factory neu alui khat honglei in tuapan furniture bawlziahziah hi. abawl khiat te asai ah kiman mahmah hi zuakhi. Mikim in zuan hi. IKEA minthang semsem hi. Furniture abawl adang company te lungkim lo in “IKEA in furniture thumaanlo in mantawmtak in zuakhi” ci in sweden singthohna leh furniture organisation ah khia hi. Tua ahih man in IKEA sing kilei saknawnlo hi. Hih pen Ingvar ading haksatna lianpi hi. ahih hangin aneutung a api ih thugen phawk kik hi:” haksatna natuah ciangin lungsim khauhtakin nawktan zawhnang lampi zongin”. Amah lungkialo in singngah theih nang lampi zonghi.
Singluang akiman in Poland pan vaikhak hi. ama ih factory ah at in furniture bawlhi. tuama in sweden ah gamdangpan raw material vaikhak cih omnailo hi. Ingvar ih pat hi. tuakhit ciangin Ingvar in gamtuamtuam ah paikawikawi in singkiman na pan vaikhak hi. aban zoplai ding…
Tanu pawl